ओमराजे निंबाळकर यांची भूमिका
मुंबई : प्रतिनिधी
शिवसेना ठाकरे गटातून बाहेर पडण्याच्या हालचाली सुरू असलेल्या खासदार ओमराजे निंबाळकर यांनी पक्षांतराच्या निर्णयाबाबत आपली भूमिका स्पष्ट केली आहे. पक्ष सोडण्याचा निर्णय मनाला वेदना देणारा असला, तरी राजकीय वास्तवाचा विचार करता तो योग्य वाटत असल्याचे त्यांनी सांगितले.
निंबाळकर म्हणाले की, सध्या ते मोठ्या द्विधा मनःस्थितीत आहेत. भावनिक पातळीवर हा निर्णय चुकीचा वाटतो, मात्र मतदारसंघाच्या भविष्यासाठी आणि राजकीय अस्तित्व टिकवण्यासाठी कठोर निर्णय घ्यावा लागत आहे. स्थानिक स्वराज्य संस्थांच्या निवडणुकांमध्ये स्वतःच्या कार्यकर्त्यांना संधी मिळत नसल्याने भविष्यात राजकीय अडचणी निर्माण होऊ शकतात, अशीही त्यांनी चिंता व्यक्त केली.
मतदारसंघातील रस्ते, पूल आणि इतर विकासकामांसाठी वारंवार पाठपुरावा करूनही अपेक्षित निधी मिळत नसल्याचे त्यांनी सांगितले. सत्तेचा आणि निधीचा अभाव असल्याने नागरिकांची कामे पूर्ण करण्यात अडथळे येत असल्याची खंतही त्यांनी व्यक्त केली.
शिंदे गटात जाण्यासाठी कार्यकर्त्यांकडून मोठा दबाव असल्याचे सांगत, पवनराजे निंबाळकर हत्याकांडाच्या निकालानंतर कार्यकर्त्यांशी चर्चा करून अंतिम निर्णय जाहीर करण्यात येईल, असे त्यांनी स्पष्ट केले. पक्षांतरासाठी पैसे घेतल्याच्या किंवा विशेष सुरक्षा मिळाल्याच्या चर्चा पूर्णपणे निराधार असल्याचेही त्यांनी ठामपणे सांगितले.
मुख्यमंत्री देवेंद्र फडणवीस आणि उपमुख्यमंत्री एकनाथ शिंदे हे कार्यकर्त्यांमध्ये सतत सक्रिय असल्याचे सांगत त्यांनी त्यांच्या कामकाजाचे कौतुक केले. तसेच उद्धव ठाकरे यांना आरोग्याच्या मर्यादा असल्या तरी आदित्य ठाकरे यांनी पक्ष संघटनेत अधिक सक्रिय भूमिका घ्यायला हवी होती, असे मतही त्यांनी व्यक्त केले.
दरम्यान, ठाकरे गटाचे आमदार कैलास पाटील यांनी ओमराजे निंबाळकर यांच्याशी अद्याप संपर्क झालेला नसल्याचे सांगितले. पक्षाच्या आगामी बैठकीत पक्षप्रमुख उद्धव ठाकरे यांच्या सूचनांनुसार पुढील रणनीती ठरवली जाईल, असेही त्यांनी स्पष्ट केले.
